Willkommu uf miner Homepage!

Grossratswahlä 25.03.2018 im Kanton Bäru

Silvia Jäger - eifach anersch!

 

Liäbi Bsüächerinnä

Liäbä Bsüächer

 

Ich ha mich entschidu, fär der Grossrat im Kanton Bäru (Wahlchreis Region Bäru Mittelland Nord) am 25. März 2018 z kandidieru. Scho als chlini Meidja bin ich interessiärt gsi, was politisch abgeit, und ha immer derva gitröimt, äs Tagsch mich politisch z engagieru.

 

Als Sektionspräsidäntin vo Ittigu wiä öi als Vorschtandsmitglid vo Bäru Mittelland Nord han ich bis jetzt chännu politischi Luft schnuppru. Ufgrund miner brüäflichu Erfahrig als Schüelinschpektorin vom Kanton Bäru und jetzt als Leiteri vo der Iwohnergmeind Oensingu, weiss ich, dass äs güäts Zämuschpil zwischu der Legislativa und der Exekutiva reschpetive zwischu der Politik und der Verwaltig hüärä wichtig und ä neetigi Vorüssetzig fär ä fortschrittlichä, attraktivä und effiziäntä Kanton Bäru isch. Als offuni, lesigsorientierti und engagierti Person liggut miär der Dialog mit allu Beteiligtu sehr am Härzu. Ich bi uberzigt, dass ich mit miner unkompliziertu und diräktu Art, mit minum Wissu und mit minä Fähigkeitä als Grossrätin ä wichtigä Biitrag fär än attraktivä, sicherä und fortschrittlichä Kanton Bäru leischtu cha. Themä wiä d Fördrig vo der Zweischprachigkeit, schtarchi Volksschüelä, äs bezahlbars Gsundheitswäsu, teifi Schtiirä fär der Uner- und du Mittelschtand, d Schterchig vo dä KMUs sowie d Fördrig vo ärä nachhaltigu Landwirtschaft sind fär mich zentral. D Vermittlig vo ischä Wärtä und Tradiotionä lüäg ich als än extrem wichtigi Aschpäkt fär ischi Züäkunft a. Öi d Nechi zur Natur sowiä der Willu zur Toleranz und der Reschpäkt dum Gägunuber sind zentral fär mich und miässund in minä Öigä wider bewusster vo isch allä gläbt und vorgläbt wärdu.

 

Ich würdi mich fröiju, wenn ich uf ewi Unerschstützig cha zellu – sig das jetzt mit Wärbigmachu, mit ärä Schtimmabgab, mit ämä finanziellu Züäschtupf oder eifach ämä Düümudricku am 25. März 2018! Äs grossus Merci zum Vorüs!

 

Ewi Silvia Jäger